DAVAO CITY – Mihatag na ug pasi-unang nga funeral assistance ang Department of Labor and Employment ngadto sa mga pamilya sa mga nangamatay sa sunog sa NCCC Mall niadtong Disyembre 23 sa milabay nga tuig.
Mikabat ngadto sa baynte mil ka pesos ang gitunol sa DOLE ngadto sa mga benepisyaryo ug sumala pa kang Atty. Evelyn Ramos, Assistant Regional Director sa DOLE Eleven nga sa dili madugay mahatag nila ang nahabilin nga dies mil ka pesos.
Gitataw ni Ramos nga gi-proseso pa ang requirements sa Funeral Assistance hinongdan nga wala makompleto ang paghatag sa tabang panalapi.
Sumala sa mga pamilya nga wala’y problema kanila kung pasi-una pa lamang ang nahatag kanila gumikan kay dili mabayran ug salapi ang kinabuhi sa ilang mga kabanay, diin traynta y siete kanila mga empleyado sa Survey Sampling International (SSI) ug usa ka empleyado sa NCCC.
Labihang pasalamat sa pamilya sa mga biktima nga wala gayud sila pasagdi sa lokal nga kagamhanan. Traynta ka pamilya pa lamang ang nangahatagan ug hinabang gumikan kay wala pa nakakompleto sa ilang mga requirement ang uban nga mga pamilya.
