DAVAO CITY – Todo paningkamot ang City Health Office (CHO) nga dili na masundan pa ang pagkamatay sa usa ka biktima gumikan sa sakit nga Leptospirosis.
Kahinumduman nga usa ka padre de pamilya ang namatay, pipila ka adlaw human nga nahumol sa tubig baha ang ilang balay sa Maa, ning dakbayan sa Davao.
Nasayran nga tulo ka adlaw nga nadala sa Southern Philippines Medical (SPMC) ang biktima nga si Arnel Moro hangtud nga nakutlo-an kini sa iyang kinabuhi.
Sumala sa asawa nga si Analyn Moro, gipahayag kaniya sa mga doktor nga na-apektohan ang Kidney ni Arnel.
Aminado si Analyn nga wala magpatoplok ug Doxycycline, bisan kung duna na kini’y sentomas sa balati-an.
Sumala pa kang Barangay Kagawad Lyndon Banzon sa Barangay Maa, niadto pang Desyembre 23 nanghatag na sila ug libre nga injection nga Titanus Toxoid ug Doxycycline, alang sa mga residente nga nahumol sa tubig baha.
Dugang ni Banzon nga wala sab sila magkulang sa pagpahinumdum sa ilang mga residente nga mag-amping sa mga hugaw sa hayop nga nasagol sa tubig baha gumikan kay kini ang mamahimong hinongdan sa leptopirosis.
Sa record sa City Health Office kini pa ang unang kaso nga dunay namatay sa nahisgutang matang sa balati-an dinhi sa dakbayan sa Davao ning kasamtangan nga tuig.
