DAVAO CITY – Aprubado na sa konseho ning dakbayan sa Davao ang duruha ka resolusyon nga magtuboy sa mga bag-ong department heads alang sa City Assessor’s Office ug City Accountant’s Office.
Nauyonan sa mga magbabalaud ang appointments nila ni Engr. Jaime Adalin isip city assessor ug Vingelin Bajan isip city accountant, uban ang posisyon nga Department Head II. Sumala ni Adalin nga nangatungdanan siya sa gobyerno sulod na sa kapin 32 katuig.
Una ng gi-appoint ang nahisgutan ni Mayor Sara Duterte-Carpio isip city assessor duruha ka semana na ang milabay. Kaniadtong 2003, gituboy sab siya ni kanhi mayor Rodrigo Duterte isip assistant city cooperative development officer.
Sa milabay nga tuig 2011, gitahasan siya ni Mayor Carpio isip acting city building official ug assistant engineer.
Samtang kaniadtong Hulyo sa milabay nga tuig, gituboy siya isip officer-in-charge (OIC) sa City Assessor’s Office.
Plano karon ni Adalin nga mosumite ug proposed schedule alang sa land use project nga gamiton alang sa general division plans sa tuig 2018.
Samtang ang bag-ong gi-appoint usab nga city accountant ang nangatungdanan sa lokal nga panggamhanan sulod na sa 17 ka tuig.
Nasayran kang konsehal Conrado Baluran nga si Bajan ang nagtrabaho sa City Budget Office sulod sa 17 ka tuig ug gibansay ni kanhi city accountant, Rizalina Justol, nga naghupot na karomn sa posisyon isip deputy executive secretary for finance and administration sa Malacañang.
