DAVAO CITY – Adunay nakitang lig-on nga basehan ang City Prosecutor aron nga pasakahan ang tulo ka mga indibidwal gumikan sa pagpamaligya ug peke nga mga gold bars.
Girekomenda ni Prosecutor Daniel M. Fernandez ang mga suspek nga sila si Arnold Layson, Dolly Manumboc ug Vangie Lumbay ug kasong estafa.
Nagsumikad ang kaso sa giduso nga reklamo ni Maria Celena Mae H. Crisostomo nga nagkanayong gilinla sila ni Lumbay nga mopalit ug gold bars sa ubos lamang nga presyo sa Marilog District.
Apan dihang misulay sumala pa siya pagpalit sa maong gold bar kaniadtong Hunyo 7, gihasi sumala pa siya ni Manumboc ug sa duruha ka mga kaubanan niini pinaagi sa pagti-on ug armas.
Gilayon nga nagpadangat sa iyang reklamo sa Marilog police ang biktima nga maoy hinungdan sa pagkasikop sa mga suspek.
Gipasakahan ug syndicated estafa ang mga dinakpan apan sa resolusyon ni Fernandez, makonsidera lamang nga estafa ang kaso pinaagi sa pagpangilad ug dili kini syndicated estafa gumikan kay ang “money involved” ang gipanag-iyahan sa complainant.
Gimandoan sab ni Fernandez si Lito Bar, Jonathan alyas master Altan, alyas Kaloy, ug Joelito Manik nga moduso sa ilang counter-affidavits ilabi na nga gilambigit sila sa kaso.
Samtang gibubtyag sab ni Fernandez nga mamahimo sab nga moduso si Crisostomo ug laing reklamo batok sa duruha ka mga armadong lalaki nga miti-on kaniya ug armas.
