DAVAO CITY – Personal nga mibisita sa sibyahanan sa Bomboradyo si Manong Rogelio De Jesus ang apohan ni Jessie Mae de Jesus kinsa kalakip sa mga namatay sa nahitabong bangga sa UV express Van ug forward truck sa Mahayahay Bunawan niining milabay nga adlaw kini aron isaysay ang gidangatan sa iyang apo.
Matud pa kang Rogelio, dugay na nga wala niya igkita si Jessa Mae, 17, anyos sukad nga mihawa kini sa iyang poder mga duruha ka tuig na ang milabay.
Nasayran sa nahisgutan nga mikuyog kini sa iyang hinigugma nga si Philip Gaco kinsa kalakip sa mga namatay sa aksidente.
Nahibal-an lamang sumala pa nila nga kalakip ang iyang apo sa mga namatay human nga gikontak sila pinaagi sa numero nga nakuha sa cellphone ni Jessa Mae.
Gilayon sumala pa nga gimandoan ni Rogelio ang iyang anak nga susihon ang punerarya diin gidala ang biktima ug nakumpirma nga iya kining apo.
Nasayran sab kang Tatay Rogelio nga sukad-sukad nga mihawa sa iyang poder ang iyang apo nga si Jessa Mae, wala matud pa kini nakakita sa iyang hinigugma nga si Philip Gaco hangtud nga ilang nakumpirma nga kalakip kini sa mga namatay nga kauban sa iyang apo.
Nanawagan na lamang si Tatay Rogelio sa mga naka-ila kang Philip Gaco ug sa mga kabanay niini nga kuhaon ang patay’ng lawas sa biktima sa Rivera funeral homes gumikan kay wala sumala pay miduaw niini.
