DAVAO CITY – Nagapahigayon na karon ang Davao City Police Office (DCPO) hugtanon nga background check sa ilang mga sakop aron masubay kung nalambigit ang mga nahisgutan sa illegal nga aktibidad.
Segun ni DCPO spokesperson Police Senior Inspector (PSI) Ma. Teresita Gaspan, gipahigayon na karon ang intelligence monitoring aron masayran kung si kinsa kadtong mhga personahe nga adunay mga hiwing binuhatan human usab ang pagkasikop kang Superintendent Maria Christina Nobleza, Philippine National Police (PNP) Crime Laboratory Davao deputy regional chief didto sa Bohol.
Una ng gibutyag ni Gaspan nga nakurat sila sa report nga si Nobleza ang adunay kalambigitan sa bandidong Abu Sayaf Group (ASG).
Gitataw sab ni Gaspan nga sa gipagula nga kamandoan ni PNP chief Ronald dela Rosa ug DCPO city director Police Senior Superintendent Alexander Tagum, kinahanglan nga dili i-tolerate ang mga dili maayo nga gawi sa ilang mga personahe.
Gitataw sab sa opisyal nga ang nahitabo sumala pa kang Nobleza usa ka isolated case ug dili otomatiko nga idamay ang tibuok organisasyon sa kapulisan.
Gumikan kay nagpadayon ang imbestigasyon kang Nobleza, mibalibad na sab nga moluwat ug dugang impormasyon ang opisyal.
Gipasalig sab karon sa DCPO nga nagbinantayon sila karon sa bisan unsa man nga sitwasyon ug nagpatuman na sab sila karon ug maximum security measures aron malikayan ang bisan unsa man nga pagpangatake nga himuon dinhi sa dakbayan.
