DAVAO CITY – Gikumpirma ni Jay Apiag, spokesperson sa Karapatan Southern Mindanao nga usa ka Danilo Nadal, kanhi mag-uuma sa Compostela Valley province ang gipusil patay sa gikanayong mga sakop sa 46th Infantry Battalion Philippine army samtang sakay sumala pa sa iyang motorsiklo samtang gisubay ang dalan sa Barangay Tibagun, Pantukan lungsod sa Compostela Valley.
Naila ang biktima nga usa ka Danilo Nadal, 37, miyembro sa Hugpong sa mga Mag-uuma sa Pantukan (HUMAPAN), usa ka lokal nga grupo sa mga mag-uuma sa nahisgutan nga lungsod.
Gikanayong nakaangkon si Nadal ug multiple gunshot wounds nga maoy hinungdan sa iyang hinanali nga kamatayon. Matud pa kang Apiag nga si Nadal mao ang ika-20 sa nahitabong political killings dinhi sa rehiyon ilalom sa administrasyon ni Pangulong Duterte.
Hinuon wala mihatag ug komento ang militar kalabot sa nahimong pasangil sa Karapatan.
Samtang nagpahayag ang National Democratic Front of the Philippines sa ilang pagka-alarma sa gikanayong sunod-sunod nga pagpamatay sa mga mag-uuma ug mga peasant activists nga nalambigit sa pagpakigbisog sa ilang mga yutang kabilin hinungdan nga angayan sumala pa nga hatagan na kini ug igo nga pagtagad sa gobyerno.
