DAVAO CITY – Plano karon sa Land Transportation Office Regional Office -XI (LTO-XI) nga mogamit ug “image-capturing speed guns” alang sa pagsikop sa mga malapason sa balaud.
Matud pa kang LTO-XI Assistant Regional Director Neil Canedo, adunay alokasyon ang LTO-XI office aron pagpalit sa nahisgutan nga klase sa speed guns.
Ang nahisgutan nga ekipo adunay katakos nga makuhaan ug hulagway ang mga nagdagan nga sakyanan ingon man ang kakusog sa dagan niini kung itandi sa speed gun nga kasamtangan nila nga gigamit.
Gitataw ni Canedo nga sa kasamtangang, giproseso na sa LTO ang pagpalit sa imaging speed guns nga gibana-banaang mobalor ug P400,000 ngadto na sa P500,000.
Kahinumduman nga mas gipahugtan karon sa LTO ang pagpanakop sa mga malapason sa balaud kini human nga gipagula ni kanhi Mayor ug karon Pangulong Rodrigo Duterte ang Executive Order 39 nga kinahangla istrikto nga ipatuman ang speed limit regulations sa mga lugar nga sakop sa dakbayan sa Davao.
