DAVAO CITY – Kapakyas sa Dole Philippines nga makahatag ug revolutionary tax ngadto sa mga rebeldeng New People’s Army (NPA) ang nag-unang hinongdan nga gidabdaban sa mga rebelde ang tulo ka mga container van sa Canlawig, Maragusan, Compostela Valley Province.
Mga sais kilometros lamang ang gilay-on gikan sa sentro sa lungsod sa Maragusan natigayon ang nahisgutan nga pagpanonog.
Nasayran nga ang nahisgutan nga mga container van dad-on na unta sa mga pantalan sa dakbayan sa Davao aron nga ibiyahe padulong sa langyaw’ng kanasuran sa dihang gibabagan kini sa mga rebelde ug gipangsunog kaganinang mga alas 7:00 ang takna sa buntag.
Puno ug mga saging ang nahisgutan nga mga container ban sa dihang gipangsunog sa mga NPA.
Daan na nga nagmagahi ang mga rebelde nga dili sila mamahimo nga did-an sa kagamhanan nga mopatuman sab sa ilang matang sa pagpaningil ug buhis gikan sa mga kompanya nga naglihok sa ilang mga giilang teritoryo.
Gatusan ka milyon ka pesos ang nahimong danyos sa nmahisgutan nga pagpanonog.
