DAVAO CITY – Bisan nga okupado ang mga empleyado sa lokal nga panggamhanan sa siyudad atol sa gipahigayon nga aktbidad kagahapong adlawa isip kabahin sa 2017 Employees Day, wala pa gihapon napasagdan sa City Hall ang pag-atiman sa ilang mga kliyente.
Matud pa kang Davao City Human Resource and Management head Erwin Alparaque , gisiguro nila nga dili maapektohan ang paghatag ug serbisyo ilabi na sa mga ginapahigayon nga transaksiyon ug gani abli pa gihapon ang tanan nga mga buhatan kagahapong adlawa.
Nasayran kang Alparaque nga ang mga misalmut sa Zumba ug Larong Pinoy mao ang mga pinili nga empleyado sa matag departamento.
Kalakip sab sa ilang aktibidad ang Wellness program alang sa mga empleyado nga gipahigayon sa City Hall Training Hall sa third floor diin libre nga nagpamasahe, nagpagupit, nag-facial ingon man nakapahimulos sa libre nga medical services ang mga empleyado sama sa cardiovascular, diabetes screening, free nutrition orientation, blood pressure ug check-up.
Samtang nagpahigayon sab sila ug cheerdance ug singing duo competition kagabii diin dagkong mga pa-premyo ang nadawat sa mananaug.
