DAVAO CITY – Adunay nakitang lig-on nga basehan ang City Prosecutor Office aron irekomenda nga pasakahan ug kaso ang usa ka lalaki nga nagmolestiya sa usa ka 17 anyos nga babaye sa Sitio Macleod, Barangay Daliao, Toril District.
Girekomenda ni Prosecutor Inere Joy Tala-Montero nga pasakahan si Vicente I. Arguilles ug child abuse ilalom sa Republic Act 7610 (Protection Against Child Abuse, Exploitation and Discrimination).
Kahinumduman nga wala gidawat ni Arguilles ang iyang katungod alang sa preliminary investigation hinungdan nga giresolba gilayon ang kaso pinasikad sa gipresenta nga mga ebidensiya.
Subay sa imbestigasyon, natulog lamang sulod sa pinuy-anan sa iyang iyaan ang biktima dihang kalit nga misulod ang suspek ug migunit kaniya.
Mibangon sumala pa ang biktima ug giwakli ang kamut ni Arguilles apan padayon sumala pa siya nga gimolestiya niini. Miundang lamang ang suspek dihang nakamatikod ang igsuon sa minor de edad nga adunay nahitabong komosyon ug paspas nga migawas sa pinuy-anan ang nahisgutan.
Gi-ubanan sumala pa ang batan-on sa iyang inahan sa pagduso ug reklamo hinungdan nga nasikop si Arguilles sa follow-up operation.
Gitino ni Prosecutor Tala-Montero nga ang pagsikop kay Arguilles pinaagi sa hot pursuit operation ang nahasubay sa balaud.
