DAVAO CITY – Gibutyag sa usa ka opisyal sa Davao Police nga nalisdan ang mga kapulisan sa pagsubay sa mga sakop sa New People’s Army (NPA) gumikan kay mosagol sumala pa kini sa mga masa sa higayon nga maglusad ug paggukod kanila ang otoridad.
Matud pa kang Davao Police Regional Office Director Chief Superintendent Manuel Gaerlan, tagoan matud pa sa mga rebelde ang ilang mga armas ayha kini mosagol sa mga tawo sa komunidad hinungdan nga lisud ang ilang ginapahigayon nga hot pursuit operations.
Samtang kabahin sa upat ka mga napatay nga kapulisan sa Bansalan, Davao del Sur, gipasalig ni Gaerlan nga tabangan ang pamilya sa mga biktima ug hatagan sab ug scholarship ang mga anak niini.
Gipahimangnoan sab niini ang mga police stations sa Calinan, Marilog, Baguio, ug Paquibato nga kinahanglan magbinantayon batok sa mga rebelde nga anaa sa ilang areas of responsibility partikular na kadtong nahimutang duol sa utlanan sa bukiron nga bahin sa Bansalan.
Una na sab nga gibutyag ni DCPO spokesperson Senior Inspector Catherine dela Rey nga gipatuman nila ang alert level sukad nga gisuspende ni Pangulong Rodrigo Duterte ang unilateral ceasefire tali sa gobyerno ug komunistang grupo.
