DAVAO CITY – Nadala sa balay tambalanan ang driver human kini nasunog, samtang lain pang driver bali ang paa human nga nagkabangga kini mga alas siete kagabii sa national highway sa Liling, Hagonoy, Davao del Sur.
Naila ang mga biktima nga sila si Michael Doledo, 24 anyos, residente sa Purok Bangus, Barangay Dawis, dakbayan sa Digos nga nakahi-agum ug daghanan nga mga paso.
Ang lain pang driver nga naila nga usa ka Joel Bilowaw, 24 anyos, residente sa Astorga, Santa Cruz, Davao del Sur nga nakahi-agum ug bali sa iyang paa nga bahin, samtang ang back ride nga si Jaime Anotado, 38 anyos, residente sa Liling, Hagonoy, Davao del Sur, nakahi-agum ug mga pangus sa iyang lawas nga bahin.
Sa pasi-unang imbestigasyon sa kapolisan nasayran nga alas siete kagabii, samtang ang na-hisgutan nga mga biktima sakay sa ilang tagsa-tagsa ka mga motorsiklo subay sa National Highway sa Liling Hagonoy, Davao del Sur, apan lain pang motor diin angkas ang usa ka Jaime Anotado nga nagbitbit sab ug usa ka galon nga gasolina.
Ang nag-una nga motor nga gimaneho sa usa ka Michael kalit nga mi-left turn samtang bout sab unta nga mo-overtake ang laing nagsunod nga motorsiklo hinongdan nga nagkabangga kini.
Sa kakusog sa impact kalit na lamang nga misilaob ang bitbit nga gasolina nga milakit sa tagsa-tagsa nila ka mga motorsiklo.
Ang usa ka Michael Doledo nasabligan sa nausik nga gasoline, hinongdan nga misilaob sab kini, lakip na ang duha ka mga motorsiklo.
Gumikan sa nahisgutan nga panghitabo ang mga residente sa dapit dali nga mitabang sa mga biktima nga dali nga gipangdala Davao del Sur Provincial Hospital ug pabilin pang gipangtambalan sa mga mananambal.
Labihang gubaa sa mga nagkabangga nga mga motorsiklo human gilamoy sa kalayo.
