DAVAO CITY – Doble karon ang pagmonitor sa mga sakop sa Davao del Sur Provincial Police Office (DSPPO) aron lamang mabantayan ang seguridad sa probinsiya kini human nga dako sumala pa ang bahad nga momugna ug kasamok ang mga sakop sa rebeldeng New People’s Army (NPA).
Una na matud pa nga migula ang impormasyon nga ipakatag sa mga rebeldeng grupo ang ilang mga Special Partisan Unit (SPARU) units aron nga mohimo ug pagpanabotahe sa mga kalungsuran.
Tungod niini, nagpahigayon na karon ug hugtanon nga checkpoint ang lalawigan sa mga national highway sa dakbayan sa Sta. Cruz aron masiguro nga dili makalusot ang mga dautang elemento.
Una ng gimandoan ni DSPPO Provincial Director Samuel Gadingan ang tanang hepe sa kapulisan sa lalawigan nga dili mokompiyansa sa ilang palibut aron nga dili maka-atraka ang mga rebelde.
Samtang gipasalig sab sa kasundalohan nga padayon ang ilang gipahigayon nga pagpatrolya sa kabukiran aron mapakgang ang mga dautang plano sa mga komunista.
