DAVAO CITY – Gituohan nga dili na ma-antus nga suliran sa kinabuhi ang hinongdan nga naghikog ang wala pa gihapon maila nga lalaki nga mi-ambak gikan sa 5th Floor sa Gaisano Mall, sa JP Laurel Avenue, ning dakbayan sa Davao kaganinang alas 10:04 ang takna sa buntag.
Sumala pa kang Jomari Alameda, nagapamaligya ug juice sa mall nga mao pa lama’y pag-abli sa mall sa dihang kalit na lamang nga mipaka sa atrium nga bahin ug nakita na lamang sa mga tenants ug sa mga katawhan sa sulod sa mall ang lalaki nga nabulit ug dugo.
Una nang gikatuohan nga bangko lamang ang nahulog ug mipaka sa salog sa mall.
Gikahulagway ang biktima nga nagsul-ob ug kaki nga shorts ug strife nga t-shirt ug gibana-bana nga 20 hangtud 30 anyos ang pangidaron.
Gikompirma ni PCI Noland Genova sa Scene of the Crime Operatives (SOCO) sa Davao City Police Office (DCPO) nga midungan sa pagsulod ang biktima sa pag-abli sa mall ug milahos sa 5th floor ug wala’y pupanagana nga mi-ambak.
Subay sa paghiling sa SOCO nabuak ang bagul-bagul sa biktima nga misangpot sa iyang kamatayon.
Duna kini’y tattoo nga neon-fire sa tuo nga bukton.
Wala’y unod ang mga bulsa sa biktima.
Wala sab kini tsinilas.
