DAVAO CITY – Kinatibuk-ang 91 ka mga public officials ang na-dismiss sa ilang serbisyo subay sa 2016 report sa Office of the Ombudsman in Mindanao.
Sa nahisgutan nga ihap, 11 niini ang mga naghupot ug taas nga posisyon nga napalagpot sa serbisyo tungod sa kasong kriminal ug administratibo.
Matud pa kang Atty. Faith Presbitero ang tigpamaba sa Office of the Ombudsman Mindanao, pipila sa mga nahawa sa katungdanan ang gilangkuban nila ni Lingig, Surigao del Sur Mayor Roberto Luna, Jr., Trento, Agusan Mayor Johnmark Billanes, Balabagan, Lanao del Sur Mayor Edna Ogka-Benito, ug lima ka mga miyembro sa Sangguniang Bayan sa Trento.
Gipalagpot sab sa katungdanan si kanhi North Cotabato Representative ug karon Vice Governor, Gregorio Ipong tungod sa kasong grave misconduct tungod sa paggamit sa iyang 2007 Priority Development Assistance Fund.
Nahawa sab sa serbisyo sila si Atty. Macapado Guro, kanhi Regional Director sa NPC IX, ug ang kanhi NTC XII Director nga si Ismael Cabural.
Dugang sa nahisgutan nga kalakip sab sa na-dismiss ang 107 officials diin 23 niini ang suspendido sulod sa unom ka bulan tungod sa mga nagkadaiyang salaud nga nahimo sama sa pag-abuso sa ilang katungdanan ingon man irregularidad nga nakita sa ilang Statement of Assets and Liabilities.
Nasayran sab kang Presbitero nga sagad sa mga salaud nga nahimo sa mga opisyal sa gobyerno mao ang kalapasan sa Anti-Graft and Corrupt Practices Act, falsification of documents, malversation of funds, ug perjury.
