DAVAO CITY – Kabsan sa kinabuhi ang usa ka 1 year old nga bata samtang kritikal ang kahimtang sa igsuon niini human nga naligiran og dagkong bato kagahapon sa buntag, Abril 21, sa may Sibulan River, Sta. Cruz, Davao del Sur.
Sumala sa iyaan sa mga bata, bag-o lang nahuman ang pagligo-ligo sa mga bata sa maong sapa ug sumala pa gibiyaan kadali sa inahan ang mga anak.
Pipila ka higayon niana, namatikdan sa mga kaubanan nga nilihok ang dagkong bato diin nakasilong ang mga bata.
Paspas nga giduol sa amahan ang mga anak apan naluwas lamang niya ang 4 years old nga anak nga lalaki ug gilayong naligiran sa dagkong bato ang batang masuso.
Gisulayan pa og bira ang batang lalaki apan naigo ang siko sa amahan maong nabuhian ang anak nga nagresulta sa pagkahiagom og piang sa lawas niini.
Paspas sab nga nitabang ang barangay ug ang MDRRMO sa Santa Cruz aron mahaw-as ang bata gamit ang backhoe samtang nadala pa ngadto sa Southern Philippines Medical Center ang batang lalaki.
via || Bombo LJF
