DAVAO CITY – Gipamugos sa City Health Office ngadto sa tanang Dabawenyo nga ugalion ang pag-praktis sa 4 O’Clock Habit dungan sa nagpadayon nga pagsaka sa mga kaso sa dengue sa nasud.
Giawhag ni Davao City Health Office Tropical Disease Prevention and Control Unit head Elizabeth Banzon ang mga Dabawenyo nga sundon ang mga lakang aron malikayan ang pagkuyanap sa dengue tungod kay ang siyudad mitala na og 957 ka kaso gikan Enero hangtod Hulyo ning kasamtangang tuig.
Kahinumduman nga ang 4 O’Clock Habit usa sa aktibidad nga kanunay ginapaningkamutan sa Department of Health aron mapugngan ang pagdaghan sa kaso sa Dengue.
Lakip niini ang pagpangita ug pagguba sa mga tinubdan sa lamok o ang breeding sites sama na lamang sa nagpundo nga tubig, paglimpyo sa mga wala gigamit nga containers o mga sudlanan, ligid, ug ingon man dahon o kung asa magpundo ang tubig.
Una nang nanawagan si Banzon ngadto sa publiko nga mag-igmat ug mahimong responsable gumikan adunay pagsaka sa kaso sa dengue sa syudad sukad Enero hangtud Hunyo ning tuiga kung itandi sa susumang panahon sa nakalabay nga tuig nga anaa lamang sa 926 cases.
Ning kasamtangan, muabot na sa lima ka tawo ang namatay gumikan sa dengue apan gamay lamang kini kung itandi sa susamang panahon niadtong 2021 nga adunay pito ang nakabsan sa kinabuhi.
Ang lima nga nangamatay ang naggikan sa Agdao Centro, Bucana, Matina Aplaya , Sasa, ug Matina Pangi.
Samtang, nagpahinumdom ang opisyal sa mga ginikanan nga dili pasul-obon og dark colored clothes ang mga bata aron dili makadani og lamok.
Nagpadayon sab ang CHO sa pagpahgayon og fogging operations, soaking curtains ug mosquito nets , ug nagpahigayon og surveillance sa possibleng mahimong tinubdan sa lamok.
Via || Hana Rallos
