Patay ang 27 ka tawo samtang 63 usab ang naangol human sa dakong sunog nga misilaob sa usa ka pub sa Bangkok, Thailand karung Lunes, Hulyo 13, 2026 sa kadlawon.
Sumala sa mga opisyal, nahitabo ang insidente sa Na Ladprao pub sa amihanang bahin sa kaulohan sa Thailand, diin paspas nga mikatag ang kalayo ug ang baga nga aso sulod sa establisimyento.
Matod ni Thailand Prime Minister Anutin Charnvirakul, padayon pa ang imbestigasyon sa hinungdan sa sunog. Sumala usab sa nakasaksi nga musikero nga nag-perform sa maong lugar, nakakita kini og aso nga migawas gikan sa circuit breaker duol sa entablado sa wala pa mapalong ang kuryente, gisundan dayun kini sa usa ka kusog nga pagbuto ug paspas nga pagkaylap sa aso.
Daghang biktima ang nakit-an sa likurang bahin sa pub duol sa mga comfort room, diin daghan ang misulay og pangita og agianan paggawas. Nasuta usab nga wala’y fire exit ang maong establisimyento, hinungdan nga daghan ang na-trap sulod.
Sumala kang Bangkok Governor Chadchart Sittipunt, 63 ka tawo ang gidala sa ospital, diin 22 kanila ang anaa sa kritikal nga kahimtang. Padayon usab ang proseso sa pag-ila sa mga biktima tungod kay daghan kanila ang walay dala nga identification card atol sa insidente.
Gibana-banang tunga sa oras nakontrolar sa mga bombero ang sunog. Pagkahuman niini, makita ang grabeng kadaot sa aong hub. Nagpahimutang usab ang mga awtoridad og lugar alang sa mga paryente nga nangita sa ilang mga minahal sa kinabuhi.
Samtang, kahinumdoman usab nga adunay mga susamang insidente sa Thailand kaniadto kaniadtong 2022, diin 14 ka tawo ang namatay sa sunog sa usa usab ka music pub sa sidlakang bahin sa nasod, samtang kaniadtong 2009, kapin 66 ka tawo ang namatay ug sobra 200 ang naangol sa sunog sa Santika nightclub sa Bangkok atol sa selebrasyon sa Bag-ong Tuig.
