Mokabat sa 258 ka pamilyang benepisyaryo sa Pantawid Pamilyang Pilipino Program o 4Ps sa Mabini, Davao de Oro ang opisyal nang nagtapos sa maong programa human makab-ot ang mas lig-on nga kahimtang sa kinabuhi.
Gihimo ang Breakthrough 2026: Graduation and Exit Ceremony sa Municipal Gymnasium sa Mabini, nga gitambongan sa mga representante sa Department of Social Welfare and Development o DSWD Field Office XI, lokal nga panggobyerno ug uban pang partner stakeholders.
Kabahin sa kalihokan ang simbolikong pagtugyan sa mga case folder ug family intervention documents ngadto sa Municipal Social Welfare and Development Office sa Mabini isip bahin sa padayon nga suporta alang sa mga pamilyang migawas na sa programa.
Usa sa gipasiugda sa kalihokan ang istorya sa Pamilyang Amistad, diin gipaambit ni Nenita P. Amistad, nga giila isip Huwarang Pamilya sa Davao de Oro, ang ilang panaw gikan sa mga kalisdanan ngadto sa mas maayong kahimtang sa kinabuhi.
Samtang, giingon sa DSWD nga ang pagtapos sa 258 ka pamilya sa 4Ps dili katapusan, kondili pagsugod sa bag-ong yugto diin ilang gamiton ang mga kahibalo ug kahanas nga ilang nakat-unan aron mapadayon ang ilang kaugalingong pag-uswag. | VIA BOMBO EROS PAJOTA
