Dili moubos sa 22 ka tawo ang namatay human miigo ang kusog nga linog sa kasadpang bahin sa Colombia kagahapong Lunes.
Pinakagrabe ang epekto sa Pereira diin 18 ka tawo ang gikumpirmang namatay, samtang tulo ang namatay sa kasikbit nga Manizales ug usa sa Buenaventura human maguba ang usa ka building.
Sa Cali, kapin duha ka dosenang mga estruktura ang nangaguba ug adunay mga tawo nga natanggong ilawom sa mga kaguba.
Duha na ka tawo ang naluwas sa rescue operation, lakip ang usa ka tigulang nga babaye ug usa ka batang babaye, samtang padayon ang pagpangita sa ubang posibleng natanggong.
Gibanabanang magnitude 7.4 ang kusog sa linog nga miigo pasado alas 7:34 sa buntag ug may giladmon nga 96 kilometros, base sa Colombian Geological Service.
Nabati ang kusog nga pag-uyog sa tanang 32 ka departmental capitals sa Colombia.
Temporaryong gisuspinde ang operasyon sa pipila ka airport samtang gisusi ang mga building tungod sa posibleng kadaot. Nagpasidaan usab ang mga otoridad sa posibleng mga aftershock.
