Patay ang usa ka senior citizen samtang usa pa ang padayon nga ginatabang sa ospital human sa sunog nga mihitabo sa usa ka Prayer House sa Purok 2, Barangay 33-D, Aurora Quezon Street, Davao City, pasado alas-4 sa kaadlawon, Nobyembre 7, 2025, sumala sa report sa San Pedro Police Station ug Bureau of Fire Protection (BFP).
Duha ka babayeng senior citizen ang girescue atol sa maong insidente.
Gikumpirma ni PMAJ Emmanuel D. Manlatican, Station Commander sa San Pedro Police Station, ang panghitabo, samtang si FO1 Eunell Mabale, Fire Arson Investigator sa BFP, mitaho nga nakontrol ang kalayo pasado alas-5:25 sa buntag ug gideklarang fire out alas-5:44 AM.
Giila ang mga biktima nga mag-igsoon nga sila Anita Ababan, 73 anyos, ug Teresita “Tessie” Ababan, 65 anyos, pulos mga single blessedness ug residente sa maong lugar.
Nakit-an ang duha nga na trap sa ilang kwarto kung diin si Tessie, patay nang nakaplagan sa mga kabomberohan ug
gideklarang dead on arrival, samtang si Anita gidala sa Southern Philippines Medical Center (SPMC) human nga napartially burned kon 4th degree burn ang natagamtaman sa maong senior citizen ug hangtod karon padayon pa nga ginarevive ug ginaatiman sa mga doktor.
Sa pagsusi sa Bombo Radyo Davao sa mismong lugar nga nahitaboan sa insidente, atong nasayran na duha ka andana ang balay nga gipatindog-pa sukad 1980’s, ug sakop kini sa Loved Flock Catholic Charismatic Renewal Ministries, diin aktibo ug mibarog isip leader sa maong simbahan.
Matud pa sa atong nakahinabi na kaubanan nila sa church, anibersaryo unta sa simbahan ugma, Nobyembre 8, 2025, ug andam na unta ang mag igsuon sa pagselebrar kauban ilang mga church members.
Apan sa maong panghitabo ang kamatayon diay ang misugat kanila.
Matud pa ni Romel Barrientos, usa sa mga silingan, nasayran nga adunay bata nga gitahod nga na-trap sa comfort room, apan wala pa kini makumpirma sa mga otoridad.
Samtang, posibleng isa ka bata ang nalambigit sa pagsugod sa kalayo tungod kay ilang namatikdan nga ang coin bottle o sudlanan sa mga halad nga kasagaran ibutang sa altar, nakit-an sa daplin sa gate.
Gidugang pa ni Barrientos nga walay suod nga pamilya ang duha ka senior citizen dinhi sa Davao, ug padayon pa nga ginakontak sa mga otoridad ang ilang mga igsuon nga sila Lorie, Bingbing, ug Annie, nga kasamtangang nagpuyo sa Cebu ug Australia.
Sa kasamtangan, ang mga silingan ug mga church members nagsilbi isip kabanay samtang ginapaabot ang mga immediate relatives.
Gihipos nila ang mga nabilin nga kabtangan aron malikayan nga mawala o makawatan, lakip na ang mga rebolto sa mga Santos, imahe ni Mama Mary, mga instrumento sa simbahan, ug uban pang gamit.
Kahinumdoman nga dili na kini unang higayon nga sudlan og kawaton ang maong Prayer House, diin una na usab nga nawala ang mga halad ug ubang kabtangan.
Naghinaot ang mga kasilinganan ug mga kaubang simbahan nga makabangon pa si Anita Ababan, nga padayon pa karon gina-revive sa SPMC.
Giingon nila nga maayo kini nga tawo ug matinabangon, ug ila kining giisip nga murag inahan sa komunidad tungod sa iyang pagkamaabiabihon ug pagkarelihiyoso.
Gibanabana nga ₱350,000 ang kadaot nga natala sa maong sunog. Kung diin 60%-70% ang damage sa maong prayer house.
Padayon karon ang lawom nga imbestigasyon sa Bureau of Fire Protection aron matino kung unsa gyud ang tinuod nga hinungdan sa sunog. Matud pa sa mga residente ug church members, hinaot nga matino kung adunay foul play, ug kung mapamatud-an kini, andam silang motabang ug molihok aron makab-ot ang hustisya alang sa duha ka igsoon.
Sa laing bahin, nagpahimangno karon ang BFP ug mga otoridad sa kahinungdanon sa CCTV camera sa mga simbahan ug panimalay aron dali matino ang hinungdan ug masiguro ang seguridad sa komunidad sa susamang mga insidente.
Gibug-atan usab sa BFP na ang mga daan o karaang electrical wirings, dapat kini ilisan ug regular nga ipa-check, ilabi na kung sobra na sa napulo o baynte ka tuig ang edad sa gambalay.
Gihangyo usab ang publiko nga magpahigayon og preventive maintenance ug safety inspection aron malikayan ang sunog.
