DAVAO CITY Gipasalig sa kasundalohan nga magpadayon ang ilang paghatag ug hinabang sa mga kanhi rebelde nga mobalik sa sabakan sa kagamhanan. Kahinumduman nga usa ka 14 anyos nga babaye nga miyembro sa New People’s Army (NPA) ang mitahan sa otoridad niining milabay nga adlaw sa Talaingod, Davao del Norte. Naila ang nahisgutan nga si alyas Grace, residente sa Barangay Dagohoy, Talaingod, Davao del Norte.
Gikanayon sa nahisgutan nga aduna pay lain nga mga minor de edad ang nagpabilin karon sa kalihokan.
Gikanayong nagsilbi si Grace nga medic sa Andoy platoon sa Sub-Regional Guerilla Unit, Sub-Regional Committee 5, Southern Mindanao Regional Committee of the NPA.
Una ng nasayran kang Captain Erick Wynmer F. Calulot, public information officer sa 1003rd Infantry (Raptor) Brigade, nga mitahan si Grace kang Lieutenant Colonel Norman E. Valdez, commanding officer sa 56th Infantry Battalion sa Barangay Sto Niño, Talaingod.
Nakadesisyon sumala pa siya sa pagtahan human nga iyang nakita ang senseridad sa Community Support Program Team sa kagamhanan nga atimanon ang mga nag-unang suliran sa komunidad.
Human ang iyang pagtahan, gi-turn over ang minor de edad sa protective custody sa Municipal Social Welfare and Development Office sa Talaingod diin ipailalom kini sa psychological ug uban pang gikinahanglan nga evaluations.
Nakiglambigit na sba karon ang 56th IB ngadto sa Philippine National Police Talaingod alang sa pagpasaka ug kaso batok sa NPA leaders nga nakalapas sa katungod sa mga kabataan.
Hugtanon sab nga gikondena ni Colonel Nolasco Mempin, commander sa 1003rd Brigade, ang padayon nga pagpang-recruit sa mga NPA ug mga minor de edad isip mga combatants nga usa ka kalapasan sa balaod.
