Usa sa matag napulo ka bag-ong kaso sa human immunodeficiency virus o HIV sa unang quarter sa tuig ang nakuha pinaagi sa transactional sex o pakighilawas nga adunay baylo nga kantidad.
Base sa gipagawas nga datos sa HIV and AIDS Surveillance sa Pilipinas, miabot sa 5,101 ka kaso sa HIV ang natala gikan Enero hangtod Marso ning tuiga.
Gikan niining ihap, 596 ka kaso o katugbang sa 12 porsyento ang nakuha pinaagi sa transactional sex sulod sa miaging 12 ka bulan.
Apil niini ang mga nagabayad ug mga nagapa-bayad alang sa pakighilawas.
Sukad sa unang pagreport sa transactional sex niadtong 2012, miabot na sa 16,586 ang total nga natalang kaso niini.
Sumala sa Department of Health (DOH), 54% o katugbang sa 8,962 sa tibuok ihap sa kaso ang adunay kasaysayan sa transactional sex ug na-diagnose gikan 2020 hangtod 2025.
Mas sayo pa, nanawagan na ang DOH sa Malacañang nga magdeklara og Health Emergency aron matubag ang padayon nga pagsaka sa kaso sa HIV sa nasud.
