Nawad-an og kinabuhi ang 10 ka tawo human maigo sa pag-atake sa ballistic missile sa Russia ang usa ka drone exhibition duol sa Kyiv, Ukraine. Sumala pa kang Ukrainian President Volodymyr Zelensky, kapin sa 100 ka tawo ang nasamdan sa maong pag-atake nga gitambongan sa mga miyembro sa sektor sa depensa sa nasud.
Dugang pa niini, lima pa ka tawo ang namatay sa siyudad sa Sloviansk human maigo sa Russian glide bombs ang maong lugar.Matud pa ni Zelensky, nakadawat sila og impormasyon nga posible nga maglusad pag-usab ang Russia og usa ka dako nga missile strike sulod sa 48 ka oras. Samtang, unom ka tawo ang namatay ug 26 pa ang nasamdan sa Kirov, Russia human sa overnight strike nga gipasanginlang gikan sa Ukraine.
Lakip sa padayong gisusi sa mga otoridad sa Ukraine mao ang hinungdan kon nganong gipadayon ang maong pampublikong drone exhibition bisan pa sa nagpadayon nga hulga sa seguridad. Sa pagkakaron, nagpadayon ang tensyon tali sa Russia ug Ukraine samtang nagkadaghan ang mga pag-atake ug pagresponde sa duha ka panig.
Kahinumduman nga nagpadayon ang gubat tali sa duha ka nasud sulod sa kapin na sa duha ka tuig nga nakaapekto sa seguridad ug kahimtang sa mga sibilyan.
