Giduso sa Kongreso ang pagdugang og kapin 2,000 ka guidance personnel sa mga public school sa 2027 aron mapalig-on ang mental health ug child protection services taliwala sa mga insidente sa bayolente sa mga tulunghaan.
Matod ni House Minority Leader Marcelino Libanan, adunay gisugyot nga ₱802 milyon nga pondo ubos sa proposed ₱7.2-trillion national budget alang sa 2027.
Lakip niini ang paghimo og 1,800 school counselor associate positions ug 221 school division counselor positions ubos sa Department of Education.
Gipunting ni Libanan nga mas gikinahanglan ang dugang counselors tungod sa bullying, school violence ug ubang problema nga mahimong makaapekto sa mental ug emotional condition sa mga estudyante.
Dugang pa, dili igo nga physical security lamang ang palig-onon sulod sa mga eskwelahan.
Importante usab ang counselors aron sayong mailhan ang mga estudyanteng nanginahanglan og psychosocial support.
Sa pagkakaron, giawhag usab ni Libanan ang mga private elementary ug high school nga palig-onon ang ilang counseling services aron mas mapanalipdan ang kaayohan sa mga kabataan.
