Gidayeg ni Palace Press Officer Usec. Claire Castro ang mga magtutudlo human sa nauna niyang pahayag nga gisaway sa Alliance of Concerned Teachers kon ACT tungod sa giingong pagbasol sa mga guro sa problema sa pamatasan ug kapintasan sa kabatan-onan.
Matod pa ni Castro, saludo siya sa mga magtutudlo sa ilang padayong paggiya sa mga estudyante ug pagtabang sa paghulma sa maayong pamatasan.
Dugang pa, iyang gidayeg ang Grade 8 student nga si Jamaine Raine Quizon gikan sa Cebu City tungod sa infographics project bahin sa pagrespeto sa isigkatawo, paglikay sa fake news ug pagbatok sa bullying.
Apan una nang misupak ang ACT sa pahayag ni Castro nga ilang giisip nga dili patas nga pagbutang sa basol ngadto sa mga magtutudlo.
Sumala pa sa grupo, mas angay tutokan sa gobyerno ang kakulang sa classrooms, learning materials, education support personnel ug mas maayong working conditions.
Sa pagkakaron, gibarugan ni Castro nga importante gihapon ang papel sa mga guro isip kauban sa gobyerno sa paggiya sa kabatan-onan. | VIA BOMBO EROS PAJOTA
