DAVAO CITY – Gibutyag ni Davao Oriental Provincial information officer Karen Lou Deloso nga usa ang natalang namatay samtang nakauli na sab ang 675 displaced individuals nga una ng naapektohan sa mga pagbaha sa nahisgutan nga lalawigan tungod sa pag-ulan nga hatud sa Low-Pressure Area (LPA).
Una ng naila ang namatay nga si Valentine Caayon, 83 anyos, nga nalumos sa Barangay Alegria, Cateel municipality.
Samtang kagahapon sa hapon, mibalik na sab sa ilang mga pinuy-anan ang kapin 600 ka mga indibidwal.
Kahinumduman nga nakaapekto sab ang pagbaha sa lugar sa 15 pa mga pamilya sa Barangay Sergio Osmeña munisipalidad sa Governor Generoso; 65 ka mga pamilya sa La Union, San Isidro; ug 35 ka mga pamilya sa Barangay Rafael sa Cateel.
Samtang miubos na matud pa karon ang tubig baha sa dakung bahin sa lalawigan apan gipahimangnoan pa gihapon ang mga residente nga kanunay pa gihapon nga mag-igmat sanglit anaa pay datu nga kahimtang sa panahon nga mosulod sa nasud ug namatikdan sa sidlakan nga bahin sa Mindanao.
Una na sab nga gibutyag sa Philippine Atmospheric, Geophysical, and Astronomical Services Administration (PAGASA) nga padayon nga makasinate ug mag pag-ulan ang lugar sa musunod pa nga mga adlaw.
Angayan sab sumala pa nga pabiling alerto ang mga residente arun nga dili mabutang sa risgo ang kinabuhi.
