Gikumpirma sa militar sa Estados Unidos nga naglusad sila og gitawag nga “self-defense strikes” sa Qeshm Island sa Iran, samtang giatake usab sa Iranian missiles ug drones ang mga instalasyon sa Amerika sa Kuwait ug Bahrain.
Matod sa Amerika, ilang gilusad ang maong pag-atake isip depensa batok sa mga kalihokan sa Iran sa rehiyon, lakip ang giingong pag-atake sa US Fifth Fleet sa Bahrain ug mga hulga nga may kalabotan sa Qeshm Island.
Sa pahayag sa US Central Command o CENTCOM, duha ka ballistic missiles nga gibuhi-an sa Iran padulong sa Kuwait ang wala makaigo sa ilang target.
Samtang, tulo ka missiles nga gibuhi-an padulong sa Bahrain ang napugngan sa pwersa sa Estados Unidos ug Bahrain.
Gikumpirma usab sa Amerika nga ilang na-intercept ang tulo ka drones nga gikan sa Iran padulong sa mga sibilyang barko sa rehiyon.
Bisan pa sa mga engkwentro tali sa pwersa sa Estados Unidos ug Iran, gibarugan sa Washington nga nagpadayon gihapon ang ceasefire o kasabotan sa paghunong sa panag-away tali sa duha ka nasud.
