Patay ang upat ka mga indibidwal lakip na ang igo lamang unta mutabang human sa nahitabong sa magilngig nga krimen didto sa Prk. Talisay, Zafra Compound, Magugpo East, Tagum City, kagahapon sa kadlawn.
Sa report sa mga kapulisan, Agosto 9 sa kadlawn, nakadawat og tawag ang ilang buhatan kalabot sa matud pa nag-amok nga security guard sulod mismo sa boarding house gumikan nakahatag na kini og kahadlok ug distorbo sa kadaghanan hilabi pa nga nagdala-dala kini og sundang.
Gisulayan matud pa kini og pakalma sa mga nakakita sa suspek pinaagi sa pagpangutana kung unsa ang problema niini samtang nagpadulong pa ang kapulisan, apan inay tubagon kini sa tarong, gilayon kining mipadulong sa kwarto sa mga biktimang sila Alyas Jessa, 19 ug Alyas Joan, 28 anyos, pulos mga trabahante sa usa ka mall ug dayong gipangluba-patay ang duha.
Gumikan sa mangilgig nga gidangatan sa mga biktima, nisaka sa maong two-storey boarding house ang usa ka alyas “Arjay” aron unta tabangan ang mga biktima apan ulahi na ang iyang pag-abot gumikan wala nay kinabuhi sila Alyas Jessa ug Joan.
Sumala pa sa mga nirespondeng kapulisan, nihimo pa sila og negosasyon sa suspek aron unta sa pag-surrender niini apan nidasmag gihapon kini kanila rason nga napugsan na lamang silang pusilon ang suspek.
Samtang atol sab sa pagsaka sa likod nga bahin sa lain pang mga kapulisan, nakurat sila sa presensya ni alyas “Arjay” kinsa nagdala-dala usab og sundang sa tumong nga motabang unta sa pag-neutralisa sa maong insidente, apan napusilan kini sa mga kapulisan human maalaan nga suspek.
Gumikan sa nahiagoman niining pinusilan, nakutloan nasab kini og ginhawa.
Ning kasamtangan, tulo ka mga pamilya ang nagbangutan sa maong mangilngig nga krimen kalakip na ang pamilya ni “Arjay” nga dako gayud ang pagkadismaya sa mga kapulisan. Sa karon, ginapalawman pa ang imbestigasyon kalabot sa insidente.
