DAVAO CITY – Wala na nakapalag sa otoridad ang tulo ka mga estudyante kinsa nadakpan sa gilusad nga drug buy bust operation sa mga sakop sa Buhangin PNP.
Gilusad ang operasyon sa Cabantian Basketball Court, Brgy. Cabantian, Buhangin ning dakbayan sa Davao nga miresulta sa pagkasikop sa mga suspek nga sila si RAYMART MORILLA PORLAS alias “REYMART”, 19 anyos, estudyante ug residente sa Phase 2, Relocation, NHA Bangkal, Davao City; JOSHUA PADUA SALVA, 24 anyos, minyo, estudyante, residente sa Cabantian, Buhangin, Davao City ug RAFFY OLIVAR VIÑALON, 23 anyos, ulitawo ug residente sa Phase 2, Country Homes, Cabantian, Buhangin, Davao City.
Nakuha sa posisyon kang Reymart ang usa ka taas nga pakete sa marijuana bugti sa P500 nga marked money nga nakigkunsabo usab kang Raffy.
Dihang gihiling sa otoridad, narekober pa sa ilang posisyon ang duruha ka pakete sa ginadili nga droga ug cellphone.
Nagtuo ang kapulisan nga mamahimong maparalisa na ang operasyon sa ginadili nga droga sa lugar diin notado ang mga nahisgutan nga nalambigit niini.
Sagad sumala pa sa mga parokyano sa mga dinakpan ang gilangkuban sa mga estudyante, empleyado ug trisikad driver sa lugar.
Gani kalakip sumala pa ang suspek sa Directorate for Intelligence Drugs Watchlist.
Dul-an sa P10,000 nga kantidad sa mga illegal nga droga narekober sa mga dinakpan nga susamang gipangpaslak karon sa presohan.
