Nagpahayag og dakong kasubo ang ahensya sa Social Welfare and Development (DSWD) ngadto sa pamilya sa usa ka drayber nga namatay niadtong Sabado, Abril 18 samtang nagpila kini alang sa cash relief assistance.
Sumala sa DSWD, human madawat ang report gikan sa Quezon City Response Team kagahapon, mihatag dayon og direktiba si DSWD Secretary Rex Gatchalian ngadto sa Field Office National Capital Region (NCR) aron makigkoordinar sa ospital, pamilya, ug employer sa namatay nga drayber.
Personal usab nga nakig-istorya si Sec. Gatchalian sa pamilya didto sa ospital niadtong kaganinang buntag, Abril 19, aron ipaabot ang dakong kasubo sa nahitabo.
Sa kasamtangan, nakahatag na ang ahensya og ayuda alang sa bayronon sa ospital, gasto sa haya ug lubong, ug transportasyon sa mga paryente. Dugang pa, naghatag usab ang ahensya og suporta alang sa padayon nga pag-eskwela sa anak sa mitaliwang drayber.
