Nagtuo si US President Donald Trump nga “pretty soon” o sa dili madugay matapos na ang gubat tali sa Estados Unidos ug Iran.
Nagkanayon si Trump nga dili na kuno molungtad pa og dugay ang maong panagbangi tungod sa kahimtang sa Iran.
Matud pa ni Trump, adunay pipila ka limitasyon nga giatubang ang armadong pwersa sa Estados Unidos may kalabotan sa kahimtang sa ilang mga suplay sa armas.
Giingon niya nga adunay pipila ka klase sa mga bala ug war equipment nga adunay unlimited suplay, apan giila usab niya nga adunay ubang kagamitan nga limitado ang ilang imbentaryo.
Gipahayag sa Pangulo nga ang mga kompanya sa depensa sa ilang nasud nagpalapad sa produksyon pinaagi sa pagtukod og dugang nga mga pasilidad alang sa paghimo sa Patriot ug Tomahawk missiles.
Samtang, sumala sa mga report, gigamit sa US Army ang dakong bahin sa ilang global stockpile sa tukmang long-range missiles atol sa lima ka bulan nga gubat batok sa Iran.
