Patay ang pito ka tawo, lakip ang mismong 14 anyos nga suspek, human sa pagpamusil sa usa ka eskwelahan sa gawas sa Bangkok, Thailand diin napulog lima usab ang nasamdan sa maong insidente karong adlawng Biyernes, Agosto 7, 2026.
Nahitabo ang pagpamusil sa prestihiyosong Debsirin Nonthaburi School sa Bang Kruai district, Nonthaburi province, nga nahimutang sa amihan-kasadpang bahin sa gawas sa Bangkok.
Giila sa kapulisan ang suspek nga usa ka 14 anyos nga estudyante sa maong eskwelahan.
Gigamit niini ang usa ka 9mm nga armas nga gipanag-iya kuno sa iyang lolo.
Matod sa mga awtoridad, gipusil una sa suspek ang iyang lolo ug lola sa ilang pinuy-anan sa wala pa kini moadto sa eskwelahan.
Pag-abot didto, nagpabuto siya og kapin sa 26 ka bala nga hinungdan sa kalisang ug kagubot sa mga estudyante ug magtutudlo.
Nanago ang mga estudyante sulod sa ilang mga classroom samtang nagpadayon ang pagpamusil.
Lakip sa pito ka namatay ang tulo ka magtutudlo, duha ka estudyante, ug ang lolo ug lola sa suspek.
Human sa maong krimen, nagpakamatay ang suspek gamit ang iyang armas.
Sa 15 ka nasamdan, ang uban nakaangkon og kadaot samtang naningkamot og ikyas tungod sa kagubot sa lugar.
Duha sa mga biktima ang anaa sa kritikal nga kahimtang.
Gipahibalo sa Department of Foreign Affairs (DFA) nga walay Pilipino nga naapil o nasamdan sa maong trahedya.
Nagpadayon ang imbestigasyon sa Royal Thai Police aron mahibal-an ang motibo luyo sa makalilisang nga pagpamusil.
