DAVAO CITY – Miabot na og 77% ang tax collection sa lokal nga kagamhanan gikan sa mga negosyo sa syudad. Gikanayon ni Atty. Lawrence Bantiding, head sa City Treasurers Office, nga hangtud sa bulan sa Agosto niining tuiga , ang ilang buhatan nakahimo sa pagkolekta og halos 9.8 billion pesos sa business tax o 77% sa total target collection alang sa tuig kasamtangan nga kapin sa P12.5 billion.
Positibo usab ang CTO nga makab-ot nila ang nahabiling 2 ka bilyon ka pesos nga angayan makolekta o kaha labaw pa. Dugang pa ni Bantiding nga kung lantawaon, 23% na lamang ang kulang alang sa nahabiling upat ka bulan karong tuiga aron makab-ot nila ang 100% nga target niini.
Kahinumduman nga niadtong 2021, ang syudad ang naka-kolekta og halos P500 million surplus gikan sa total annual target collection. Alang sa bulan sa Agosto karong tuiga, moabot sa P300 million ang surplus nga ilang nakolekta o 119.36 percent nga accomplishment report diin 1.9 billion kapin ang nakolekta gikan sa P1.6 billion target.
Samtang gitakda na ang deadline alang sa pagbayad og business tax alang sa last quarter sa tuig karong October 20 ug naglaom si Bantinding nga ilang makolekta ang nahabiling kantidad nga gikinahanglan aron makab-ot ang P12.5 billion nga target sa syudad karong tuiga.
