Girekomendar sa National Bureau of Investigation (NBI) ngadto sa Department of Justice (DOJ) ang pagsaka og kasong kriminal batok kang kanhi Ateneo Men’s Basketball Team head coach Tab Baldwin ug 11 pa ka indibidwal kalabot sa pagkamatay sa duha ka student-athlete nga sila Rene Clert Baterbonia ug Divine Adili atol sa usa ka team-building activity sa Dipaculao, Aurora.
Atubangon nila Tab Baldwin ug unom pa ka uban ang reklamong reckless imprudence resulting in two counts of homicide tungod sa pagkamatay nila Rene Baterbonia ug Divine Adili.
Samtang, girekomendar usab ang reklamong simple negligence resulting in two counts of homicide batok kang Ateneo Athletics Director Emmanuel Fernandez ug tulo ka opisyal sa resort diin gihimo ang team-building activity.
Sa imbestigasyon sa NBI, gikuhaan og mga pahayag ang pipila ka opisyal sa Ateneo, lakip si Ateneo President Roberto “Bobby” Yap, SJ, si Tab Baldwin, uban pang mga coach, kasamtangang ug kanhi mga players, coaching staff, utility personnel, ug mga tigdumala sa resort.
Dugang pa, girefer usab sa NBI ngadto sa Department of the Interior and Local Government (DILG) ang posibleng pagsaka og administrative complaint batok sa pipila ka opisyal sa lokal nga panggamhanan sa Dipaculao, Aurora, lakip ang mga opisyal sa Business Permit and Licensing Office, Municipal Tourism and Cultural Development Office, ug Municipal Disaster Risk Reduction and Management Office.
