DAVAO CITY – Gipasalig sa ahensiya sa Davao City Police Office (DCPO) nga tutokan nila ang pagpatuman sa liquor ban sukad nga gisugdan kini pagbalik kagahapong adlawa hangtud na sa Disyembre 31 ning kasamtangan nga tuig.
Sumala pa kang Pol. Col. Kirby John Kraft, director sa Davao City Police Office (DCPO) ipatuman nila ang gipagulang executive order ni Mayor Inday Sara Duterte-Carpio ilabi na nga sangkop sa kamandoan ang one strike policy sa mga tindahan nga makasupak sa kamandoan.
Nasayran sab kang Kraft nga sukad Marso 1 hangtud Nobyembre 1, nakatala sila ug 513 ka mga nakasupak sa liquor ban; July 1 hangtud Nobyembre 1 o atol sa MGCQ period anaa na sa 590 samtang sa milabay nga Oktubre 15 hangtud Nobyembre 1 anaa sa 33.
Gitataw sab ni Kraft nga kadtong mosupak nga mga tindahan ug padayon nga mamaligya ug ilimnong makahubog, tangtangan sumala pa kini ug permit.
Padayon sab ang panawagan sa opisyal ngadto sa mga dabawenyo nga kung dili mahinungdanon ang lakaw, mas maayo sumala pa nga magpabilin na lamang sa mga panimalay ilabi na karon nga padayon ang gi-atubang nga suliran sa nasod kalabot sa Covid-19.
