Mipanawagan sila House Deputy Speaker Rep. Paolo Ortega ug Lanao del Sur Rep. Zia Alonto Adiong sa Senado nga ipadayon ang impeachment trial batok kang Vice President Sara Duterte aron mapresentar ang tanang ebidensya ug mahibal-an sa publiko ang tinuod nga kahimtang sa kaso.
Sumala pa kang Ortega, ang impeachment usa ka proseso nga gitakda sa Konstitusyon aron patas nga masusi ang mga alegasyon batok sa hataas nga mga opisyal sa gobyerno pinaagi sa ebidensya ug due process. Dugang pa niini, iyang gibutyag nga ang bisan unsang lakang nga makapugong sa pagdungog sa kaso sa wala pa mapresentar ang mga ebidensya mahimong makababag sa katungod sa publiko nga mahibal-an ang tibuok kamatuoran.
Lakip sa iyang gipadayag, andam na, ang House prosecution panel sa pagpresentar sa ilang kaso sa Senado isip impeachment court ug ilang tahuron ang mahimong desisyon niini subay sa balaod ug sa mga ebidensyang ipresentar.
Samtang, giingon usab ni Rep. Adiong nga tin-aw sa Konstitusyon nga katungdanan sa Senado ang pagdungog sa kaso ug pagdesisyon sa mga kasong impeachment, busa kinahanglan unang madungog ang mga ebidensya ug mga testigo sa duha ka panig.
Matud pa niya, giila na usab sa kampo ni Vice President Duterte ang hurisdiksyon sa impeachment court pinaagi sa pagsumite niini og mga pleadings, busa angay, nga tubagon ang mga alegasyon imbes nga mosandig sa teknikal nga mga isyu. Sa kasamtangan, gipasiugda ni Adiong nga igo na ang pagkakaplag og sala sa bisan usa lamang ka artikulo sa impeachment aron matangtang sa puwesto ang usa ka opisyal, subay sa mga probisyon sa Konstitusyon.
