Nanawagan ang Philippine National Police-Anti-Cybercrime Group (PNP-ACG) sa mga mambabalaod nga amyendahan ang SIM Card Registration Act aron mapalig-on ang kampanya batok sa cybercrime.
Matod ni PNP-ACG Director Maj. Gen. Wilson Casil Asueta, daghan gihapon sa mga cybercrime cases sa nasud ang naggamit og subscriber identity module o SIM cards.
Lakip sa mga kasong iyang gihisgutan ang scamming, online gambling ug identity exploitation.
Gipasabot ni Asueta nga adunay mga kakulang sa kasamtangang balaod nga nakapalisod sa pagmonitor ug pag-trace sa mga SIM cards nga gigamit sa ilegal nga kalihokan.
Usa sa mga gustong ipasiugda sa PNP-ACG mao ang mas hugot nga identity authentication sa dili pa ma-activate ang usa ka SIM card.
Gusto usab sa grupo nga masiguro nga makumpleto una ang authentication ug registration process sa dili pa magamit ang SIM.
Kahinumdoman nga gipirmahan ni Pangulong Ferdinand Marcos Jr. ang Republic Act No. 11934 o SIM Registration Act aron mapalig-on ang accountability sa paggamit sa SIM cards ug makatabang sa mga awtoridad sa pag-ila sa mga suspek nga nalambigit sa krimen.
Padayon ang panawagan sa PNP-ACG alang sa mas lig-on nga bersyon sa moang balaod.
