Gihimo sa National Commission of Senior Citizens o NCSC Davao Region nga prayoridad ang pagsulbad sa problema sa proof of identity sa mga senior citizen nga nag-aplay alang sa Electronic Fund Transfer o EFT cash gift.
Matud ni NCSC-Davao Project Development Officer V Filbert Sollesta, daghang grantee ang nanginahanglan og tabang sa pagkuha o pagpa-reprint sa ilang National ID ug birth certificate, mao nga nakigtambayayong ang ahensya sa Philippine Statistics Authority o PSA.
Gipasabot ni Sollesta nga mahimong gamiton isip proof of identity ang birth certificate, National ID, OSCA ID, PhilHealth ID ug uban pang government-issued identification.
Alang sa mga senior citizen nga walay bank account, mahimo usab nila kini ipakita sa ilang aplikasyon aron susihon sa NCSC-Davao.
Gipatin-aw sa ahensya nga tumong sa EFT nga mapagaan ang proseso sa pagdawat sa cash gift ug malikayan ang kalisod sa pagbiyahe sa mga senior citizen.
Giklaro usab sa NCSC nga ang EFT benefit usa gihapon ka cash gift ug dili usa ka cash assistance program. | VIA BOMBO EROS PAJOTA
