Gipasabot ni Senator-judge Robin Padilla kaniadtong Huwebes, Hulyo 17, 2026 ang iyang kontrobersyal nga pahayag nga usa siya ka “komunista,” human kini nakapukaw og nagkalain-laing reaksiyon gikan sa publiko kasunod sa impeachment trial ni Vice President Sara Duterte.
Sa iyang social media post, gikanayon ni Padilla nga ang iyang gipasabot nga komunismo wala’y kalabotan sa armadong komunismo.
Matod sa senador, dili na siya motuo sa maong ideolohiya tungod kay, sumala kaniya, daghan na ang nabiktima niini sulod sa kapin lima ka dekada.
Hinuon, iyang gipatin-aw nga ang iyang gihisgutan mao ang gitawag nga Christian communism ug ang Mu’akhat system sa Islam, nga iyang gihulagway isip karaang sistema sa pagbahinbahin ug pagtinabangay sa unang mga Kristiyano ug Muslim.
Giingon usab ni Padilla nga ang komunismong iyang gipasabot dili mao ang komunismo nga kaniadto iyang gituohan, kondili ang sistema nga iyang gihulagway nga nag-una pa sa komunismo ni Karl Marx.
Gihimo sa senador ang maong pamahayag human mireak ang aktres nga si Angel Locsin, nga nangutana nganong wala kini mipahayag sa dihang siya gi-red-tag isip komunista bisan, matod niya, nasayod si Padilla nga dili kini tinuod.
Gipahinumdoman usab ni Locsin ang mga estorya nga giingon niyang gipaambit kaniya ni Padilla kaniadto mahitungod sa panahon nga misalmot kini sa armadong kalihokan aron, sumala sa aktres, ipaglaban ang nasud.
