Mipasabot si Sen. Francis ‘Kiko’ Pangilinan nga sayop nga pagsabot ang naglutaw nga impormasyon nga walay criminal liability ang mga menor de edad nga 15 anyos paubos ubos sa balaod sa Pilipinas. Sumala pa sa maong senador, dili exempted sa balaod ang mga young offenders o mga kabataang nakalapas sa balaod, ilabina kadtong nalambigit sa seryoso nga mga krimen.
Dugang pa niini, gipasiugda ni Sen. Pangilinan nga adunay gihapon responsibilidad ang maong mga menor de edad ug kinahanglan nilang atubangon ang mga legal nga proseso may kalabotan sa ilang nahimong kalapasan. Matud pa kaniya, dili angay nga basta-basta mapagawas ang mga menor de edad nga suspek sa pagpamusil kondili kinahanglan una silang moagi sa mga proseso nga gitakda sa Juvenile Justice Law.
Lakip usab niini ang posibilidad sa pagpanubag sa mga ginikanan kon mapamatud-an nga adunay kakulangan o pagpasagad sa ilang responsibilidad isip mga ginikanan. Sa pagkakaron, nagpadayon ang diskusyon may kalabotan sa pagpatuman sa Juvenile Justice Law human sa mga insidente nga nalambigit sa mga menor de edad sa nagkadaiyang bahin sa nasud.
