Mihimo pag-usab og kasaysayan ang P-pop group nga SB19 human kini mapili isip unang grupong Pilipino nga mipahigayon sa ceremonial first pitch sa usa ka duwa sa Major League Baseball (MLB) sa Estados Unidos. Sumala pa, kabahin kini sa nagpadayon nga international tour sa lima ka miyembro sa grupo nga sila Pablo, Stell, Ken, Josh, ug Justin, diin padayon nilang gipaila ang musikang Pilipino sa internasyonal nga entablado.
Dugang pa niini, nakatakda usab nga mopasundayag ang SB19 sa Grammy Museum karong Hulyo 28 ug sa Lollapalooza sa Hulyo 30. Lakip sa ilang mga kalihokan ang fan meetings sa Estados Unidos ug Japan, ingon man ang ilang pagpasundayag sa Summer Sonic sa Japan. Matud pa, maapil na ang SB19 sa lista sa mga Pilipinong personalidad nga nakahimo na sa ceremonial first pitch sa MLB, lakip sila Manny Pacquiao, Liza Soberano ug Jo Koy.
Sa kasamtangan, dako ang kalipay sa ilang fanbase nga A’TIN, nga nagtuo nga ang maong kalampusan laing dakong lakang sa karera sa SB19 ug nagpakita sa ilang padayon nga pag-uswag isip representante sa musikang Pilipino sa internasyonal nga entablado. Kahinumduman, mas napalapad pa ang internasyonal nga oportunidad sa SB19 human kini makigpartner sa United Talent Agency (UTA), usa sa labing iladong global entertainment agencies nga nagrepresentar sa mga artista sa tibuok kalibotan.
