Nangayo og updated medical report ang Sandiganbayan alang kang kanhi Department of Public Works and Highways (DPWH) Secretary Manuel Bonoan aron matino ang tinuod niyang kahimtang sa panglawas samtang nag-atubang kini og mga kasong plunder ug graft.
Atol sa pagdungog sa kaso, gibasa ni Sandiganbayan Presiding Justice Geraldine Econg sa Second Division ang lista sa mga sakit nga giingong giantos ni Bonoan lakip ang chronic kidney disease, prostate cancer, diabetes, hypertension, acute coronary syndrome ug problema sa iyang spine.
Human madungog ang maong mga kondisyon, nakapangutana si Econg sa kadaghan sa mga sakit nga gilista sa dokumento. Sa pagkakaron, gikumpirma sa kapulisan nga naka-confine si Bonoan sa The Medical City.
Nahinumduman nga si Bonoan usa sa mga akusado sa P573 milyong plunder ug graft cases nga may kalambigitan sa giingong anomalya sa mga flood control projects. Lakip usab sa mga giakusahan si Sen. Jinggoy Estrada ug ubang kanhing opisyal sa DPWH.
Sumala sa Office of the Ombudsman, ang kaso may kalabotan sa giingong kickback scheme sa mga flood control projects sa Bulacan. Giingong adunay papel si Bonoan sa pagproseso sa mga commitment fee ug sa pagpili sa mga kontratistang nakadawat sa mga proyekto. Apan, mariing gihimakak nila ni Sen. Estrada ang tanang alegasyon nga gipasangil batok kanila.
