Nakab-ot sa HAVE IT Software Company ang opisyal nga accreditation gikan sa Land Transportation Franchising and Regulatory Board (LTFRB) Region 11, niadtong Enero 28, nga nagpasabot nga opisyal na silang Transport Network Company sa tibuok rehiyon. Ang Davao-based nga start-up nagpatikod sa RideIT app, usa ka plataporma nga nagtumong sa mas luwas, sayon, ug modernong paagi sa pag-book sa local motorcycle taxi services.
Sumala ni Regional Director Nonito Llanos III sa LTFRB XI, ang accreditation sa RideIT app dako og kaayohan para sa mga pasahero ug operator. “Kini usa ka lakang padulong sa mas komportable ug hapsay nga serbisyo sa transportasyon sa syudad ug sa tibuok Region 11,” matod niya sa post sa ahensya niadtong Pebrero 5, sa hapon.
Pinaagi sa RideIT app, ang mga motorista ug pasahero makasinati og mas hapsay nga booking system, mas klaro nga safety protocols, ug dali nga monitoring sa biyahe. Gisiguro usab sa kompaniya nga lig-on ang sistema batok sa mga scam o fraud, samtang gi-implementar ang standard nga health ug safety measures para sa tanang pasahero ug riders.
Ang accreditation naghatag og opisyal nga lehitimong pasalig sa LTFRB nga ang RideIT app mopatuman sa tanang balaod ug regulasyon sa transportasyon sa rehiyon. Sa pagkakaron, nagplano ang kompaniya sa pagpalapad sa serbisyo sa ubang lungsod ug syudad sa Region 11, aron mas daghang Dabawenyo ug residente sa rehiyon ang makabenepisyo sa modernong ride-hailing technology.
