DAVAO CITY – Magbaton og hustong kaalam ang katawhan mahitungod sa mga Indigenous Peoples sa dakbayan sa Davao – mao kana ang paglaum nga dala sa reprensentante sa Bagobo-Tagabawa sa Hiyas sa Kadayawan nga si Leizyl May Mendoza.
Sa pagbisita mismo ni Mendoza sa sibya-anan sa Bombo Radyo Davao, gi-representa niini ang iyang tribong gigikanan pinaagi sa pagsul-ob sa maanindot nila nga traditional clothing nga proudly handmade inubanan sa mga accesories sa lawas nga nagpakita sa iyahang lumadnong kagikan isip Bagobo Tagabawa.
Dako sab ang pagpasalamat niini ngadto kang Vice President Sara Duterte nga nagsul-ob sa susamang tribal attire sa milabay nga State of the Nation Adress ni Pangulong Bongbong Marcos nga nagrepresenta sab sa ilang tribo. Giatubang sab ni Leizyl ang mga pangutana mahitungod sa diskriminasyon sa mga indigenous peoples ug ang hagit sa mga kabatan-onan nga magbaton og hustong kaalam mahitungod sa mga lumad.
Nahimong dakong hagit sab sa dalaga ang pagpreserba sa kultura ug tradisyon sa ilahang tribo ilalom sa modernong panahon apan perspektibo niya nga pagakuptan ang matag aspeto sa iyang pagkatawo isip lumad. Madasigong gihisgutan ni Leizyl May ang mga kultura ug tradisyon sa mga taga-Bagobo Tagabawa.
Usa sa mga adbokasiya sa pagsalmot ni Leizyl May mao ang mapromotar ang matang sa kahimsog sa iyang mga ka-tribo. Isip 4th year student sa kursong Optometry, iyang paningkamutan nga mahuptan ang iyang kaalam isip future eye doctor alang sa iyang tribo.
Usa si Leizyl May Mendoza gikan sa Bagobo Tagabawa sa onse ka mga Dabawenya nga makigtigi alang sa titulong Hiyas sa Kadayawan 2022. Mahitabo ang coronation night karong Agosto 17, Miyerkules sa gabii sa RMC Petro Gazz Arena.
Via || LJ Florendo
