Giduso ni Parañaque 2nd District Rep. Brian Yamsuan ang sugyot balaodnon nga magpataas sa sweldo sa special needs education o SNed teachers aron matubag ang kakulang sa mga magtutudlo alang sa learners with disabilities.
Ubos sa House Bill 5574, ipataas gikan Salary Grade 14 ngadto sa Salary Grade 16 ang minimum salary grade sa SNed teachers sa public schools.
Katugbang kini sa basic pay nga ₱45,694 kada bulan karong tuiga ug ₱47,829 pag-abot sa 2027.
Matod ni Yamsuan, adunay 391,089 learners with disabilities nga naka-enroll sa public schools sa school year 2024-2025, apan wala pa mokabat og 6,000 ang SNed teachers.
Aduna usab mga 600 bag-ong SNed teaching positions nga gihimo sa Department of Education karong tuiga apan wala pa mapun-i.
Giawhag ni Yamsuan ang Civil Service Commission nga paspason ang qualification standards ug ang Kongreso nga aprubahan ang dagdag-sahod.
