Giawhag ni ACT Teachers party-list Rep. Antonio Tinio si Palace Press Officer Usec. Claire Castro nga mangayo og pasaylo tungod sa iyang naunang pahayag bahin sa papel sa mga magtutudlo sa paghulma sa pamatasan sa mga estudyante.
Matod pa ni Tinio, dili angay himuong scapegoat ang mga guro sa mga insidente sa school violence, lakip ang nahitabo sa Ateneo de Zamboanga University niadtong Agosto 18.
Dugang pa, iyang gipunto nga adunay ubang mga hinungdan nga angay tutokan sa gobyerno sama sa kakulang sa pondo sa mga eskwelahan, limitadong access sa mental health services ug mga isyu sa gun control.
Sumala pa sa kongresista, dili makatabang ang pagpasangil sa mga magtutudlo sa problema nga nagkinahanglan og mas halapad nga solusyon.
Samtang, giklaro ni Castro nga wala niya gibasol ang mga guro ug pahimangno lamang ang iyang pahayag bahin sa ilang papel sa paggiya sa kabatan-onan.
Sa pagkakaron, gibarugan ni Castro nga taas ang iyang respeto sa mga magtutudlo, ilabina kay kanhing public school teacher ang iyang inahan. | VIA BOMBO EROS PAJOTA
