Magpasaka og tukmang kaso si Akbayan Partylist Representative Perci Cendaña batok sa mga responsable sa mga makadaot nga posts online batok kaniya, ilabina sa mga komento nga naggamit sa iyang pisikal nga kahimtang aron siya pakaulawan ug biaybiayon.
Matud ni Cendaña, normal lamang ang pagsaway ug pagkondena sa trabaho sa usa ka government official, apan adunay utlanan ang kritisismo kung mosangpot na kini sa personal nga pag-atake, harassment ug diskriminasyon.
Nagkanayon ang opisyal nga nakadawat siya bag-ohay lang og mga batikos online nga nagtutok sa iyang pisikal ug medical nga kondisyon.
Gipaklaro ni Cendaña nga resulta sa iyang ang pagka stroke ang facial asymmetry o dili pantay nga porma sa iyang nawong, nga kasagarang gitawag sa pipila ka mga mibatikos kaniya og “ngiwi,” isip online harassment sa mga politikal nga detractors.
Dugang pa, dili angay himuong komedya o gamiton isip hinagiban ang pisikal nga kahimtang aron kuhaan og dignidad ang usa ka tawo.
Nakig-koordinar na ang kongresista sa iyang mga abogado aron tun-an ang posibleng pagpasaka og kaso batok sa mga responsable sa maong mga post.
Bisan pa niini, mipasalig si Cendaña nga magpadayon siyang modawat sa lehitimong kritisismo ug public scrutiny kalabot sa iyang trabaho.
Apan iyang gipasiugda nga ang mga pag-atake nga mosangpot sa harassment, pagpakaulaw ug diskriminasyon kinahanglan atubangon subay sa balaod.
