DAVAO CITY – Gitino sa lokal nga kagamhanan nga dili pugngan sa lokal nga kagamhanan ang simbahang katoliko sa dakbayan nga magpahigayon ug prusisyon ug uban pang religious activities nga mamahimong dagsaon sa mga tawo sa nagsingabot nga Semana Santa ilabi na nga nagpabilin karun ang dakbayan sa Alert Level 1 status.
Sumala pa kang Dr. Michelle Schlosser, tigpamaba sa local COVID-19 Task Force, dili pugngan sa lokal nga kagamhanan ang pipila ka mga grupo nga magpahigayon ug mga aktibidad ilabi na kung aduna kini kalabutan sa semana santa.
Kahinumduman nga gisuspende sa mga simbahan sa siyudad ang ilang face-to-face Holy Week activities sulod na sa duruha ka mga katuigan gumikan sa surge sa coronavirus disease (COVID-19) cases ug gihimo na lamang nga online ang mga gipahigayon nga misa.
Arun nga makalikay pa gihapon sa kagaw, gipahimangnoan sa opisyal ang publiko nga kinahanglan ipabilin pa gihapon ang pagsuot ug facemask ilabi na karun nga adunay bag-o na sab nga variant sa covid-19 nga mitumaw.
